كشف شريف هاني مصطفي نجل نجم النادي الأهلي السابق الراحل هاني مصطفي إيجابيات وسلبيات حسام حسن المدير الفني لمنتخب مصر الوطني الجديد.
ويستعد منتخب مصر الوطني بقيادة حسام حسن فى أول ظهور رسمي للعميد لخوض غمار تصفيات بطولة كأس العالم 2026 خلال شهر يوليو القادم.
وتعاقد مجلس ادارة اتحاد الكرة برئاسة جمال علام مع حسام حسن لتولي مهام تدريب منتخب مصر الوطني خلفا البرتغالي روي فيتوريا.
وودع منتخب مصر الوطني بقيادة البرتغالي روي فيتوريا منافسات بطولة كأس أمم إفريقيا من الدور ثمن نهائي عقب الخسارة أمام نظيره منتخب الكونغو الديمقراطية بركلات الترجيح.
وقال نجل نجم النادي الأهلي الراحل، عبر الصفحة الشخصية بموقع التواصل الاجتماعي فيسبوك: أولا ألف مبروك للكابتن حسام حسن فهو أسطورة من أساطير الكرة المصرية، وأتمنى له كل التوفيق لأن نجاحه معناه نجاح منتخب مصر وأكيد ده هدف كلنا بنتمناه.
وتابع: طول عمرنا مبالغين فى ردود أفعالنا نص بيحتفل كما لو كان الراجل نجح، و نص بيهاجم كما لو كان الراجل فشل خير الأمور الوسط… الأهم من ده المساندة وتركه يعمل براحته بدون ضغوط.
وأضاف: لو على الاختيار اعتقد الراجل من حقه فرصة على فكرة زيه زى نجوم جيله سونج الكاميرون وسيسيه السنغال والركراكى المغرب وبلماضى الجزائر وديشامب فرنسا وساوثجيت إنجلترا وغيرهم كتير.
واستطرد: لو الخوف من النتائج يعنى بالذمة مش هيعرف يتعادل ٤ ماتشات زى الاخ فيتوريا بتاع ال٢٠٠ الف دولار !!! مش هنخسر حاجة صراحة.
وواصل: طبعا معروف عنه العصبية والانفعال دى نقطة سلبية بس مش أول ولا آخر مدرب يبقى عصبى، وعلى فكرة ما عملشي مشاكل لما كان ماسك الأردن ودى نقطة إيجابية تقلل من حجم القلق من الموضوع ده.
وأكمل: بيعتمد على الروح طبعاً بس مش بالفهلوة قوى زى ما بيتم التصوير، برضوا دى مبالغة ده من المدربين المصريين الذين نالوا الرخصة التدريبية A ، و على فكرة مدربين عندنا كثيرة لهم أسماء ماحصلوش عليها.
وزاد: وموضوع ما عندوش خبرة منتخبات لا عنده يا جماعة ده هو الوحيد فى جيله اللى عنده خبرة تدريب المنتخبات عندما تولي المنتخب الأردنى.
وأكمل: مجابش بطولات فعلا بس يعنى كوبر و فيتوريا واجيرى اللى مليان عندهم دولاب البطولات مش أوى كده يعنى !!!.
وأردف: على فكرة السيرة الذاتية بتاعته كمدرب معقولة جدا تناسبا مع الفرق اللى تولى تدريبها و فيها أكثر من محطة مضيئة ودرب الزمالك فى وقت كان منهار و هو فى المركز ال١٤ و ارتقى به للمركز الثانى.
واستطرد: درب منتخب الأردن و صعد للملحق النهائى للصعود لكاس العالم لاول مرة فى تاريخها و خسر من أوروجواى و ساهم فى صعودهم لكاس اسيا للمرة الثالثة فى حياتهم و تم تكريمه من قبل المملكة هناك.
وقال أيضا: صعد ببيراميدز اول مرة فى حياته قبل نهائى الكونفدرالية وصعد مع المصرى برضوا لنصف نهائى الكونفدرالية وحصل مع الفريق البورسعيدي على المركز الرابع فى الدورى المصرى وصعد بهم نهائى كاس مصر ولعب بهم سوبر بس خسر البطولتين فى آخر دقائق من كبير افريقيا النادى الاهلى.
وعن خبراته الدولية قال: عنده خبرات دولية كلاعب هى الأعلى فى مصر وافريقيا كلها واحترف اوروبيا برضوا واكيد استفاد من تراكمات كثيرة وخبرات مدربين اشرفوا على تدريبه فى مصر وخارجها ومعروف عنه الروح يمكن يشحن اللاعبين شوية.
واختتم حديثه قائلا: هنخسر ايه نجرب و نشوف وكل الدعم اتمنى نجاحه على الاقل نساند ونقف وراه ونشوف مش هنخسر حاجة ولو نجح يبقى كسبنا مدرب وطنى و نجم كبير محبوب ووفرنا على نفسنا الاف الدولارات ولو فشل لا قدر الله يبقى زيه زى اللى قبله دى وجهة نظرى.
