انتقد أحمد عيد عبد الملك، نجم نادي الزمالك السابق، ومدرب غزل المحلة الحالي، عدم انتظام جدول مسابقة الدوري المصري وتأخر إنتهاء الموسم الحالي.
وكتب أحمد عيد عبر حسابه على موقع "فيس بوك": "عن نفسي كمدير فني صاعد مع فريق للدوري الممتاز قاعد يتفرج علي الساحة الرياضية ومفيش خريطة محطوطة لأي حاجة جاية ولا لنهاية الدوري الحالي أو بداية الدوري الجديد ولا عارف تتكلم علي صفقات مع لاعيبة الدوري الي لسة مخلصوش علشان تتعاقد معاهم ولا عارف تحط بداية فترة الاعداد بالظبط امتي وهتفضل لحد امتى تعمل الاعداد ده واحنا مخلصين دوري من أول اسبوع لشهر مايو هنستني ٥ شهور مثلاً علشان نلعب رسمي!!".
وأضاف: "الصراحة الجو العام ميساعدش اي حد يعرف يشتغل وينجح بقالنا ٤ سنين في نفس المشاكل نفسي الدوري علي الأقل يرجع لحقبة بداية الألفية الجديد ملاعب كامل العدد ومواعيد متظبطة وفرق جماهيرية موجودة في الدوري تضيف حلاوة وقوة واثارة للدوري.
وتابع: "أنا عمال احلم بس هنعمل ايه ما باليد حيلة والكرة حاليا بقت وسيلة لحاجات كتير أووي الاغلب بيستخدمها غلط ".
وختم: "منظومة محتاجة وقفات كتيرة وكبيرة ومحدش بيتحرك مستنين الحل من عنده وربنا يسترها على القادم !!".
يذكر أن نادي الزمالك، رفض خوض مواجهة الأهلي، المقرر لها الثلاثاء المقبل في الدوري، إلا قبل خوض جميع مباريات الدور الأول.
