علق البرتغالي روي فيتوريا المدير الفني لمنتخب مصر الوطني على عدم استبعاد ثنائي الزمالك أحمد فتوح ومحمد صبحي من قائمة الفراعنة الكبار فى مباراتي جيبوتي وسيراليون بتصفيات المونديال.
قال فيتوريا عبر المؤتمر الصحفي: القرار النهائي في الأول والأخر يعود لي وأنا اسمع الجميع وفي النهاية اتخذ قراري بناءً على وجهة نظري.
تابع فيتوريا: قراري النهائي استدعاء أحمد فتوح ومحمد صبحي ومكنش فيه حد عارف أنا هاخد قرار أيه بشأن الثنائي..
أضاف: بالنسبة لكلا اللاعبين ما وصل لي بشكل رسمي إن تم إيقاف الثنائي يوم الاحد الماضي والقرار النهائي للنادي بشأن موقف اللاعبين سيتم اتخاذه خلال الفترة المقبلة واتمنى أن لا يتم إيقافهما..
استطرد: استدعاء أحمد فتوح ومحمد صبحي قرار فني وأنا معجب بهما لأنهم لاعيبة منتخب وأثناء المعسكرات الماضية لم يفتعل اللاعبين أي مشاكل في المعسكر .
وواصل فيتوريا: أنا مش بمشي ورا أي كلام يتقال في الإعلام أنا بمشي مع الأخبار الواقعية والرسمية والنادي لم يتخذ القرار النهائي بشأن اللاعبين لما النادي ياخد قرار إيقافهما رسمي هنشوف قرارنا أيه.
وأكمل: هقول ليكم وجهة نظري بتتبني على أيه تخيل لو يوم 26 ديسمبر القادم قرر أي نادي إيقاف أي من لاعبي المنتخب هل تتوقع إني هستبعد اللاعب ده يوم 1 يناير لما أقدم قائمة المنتخب النهائية لأمم أفريقيا..
وقال فيتوريا أيضا: مثال ثاني تخيل لو في المعسكر المقبل حصل خلاف بين اللاعب ومدرب المنتخب في المعسكر هل لو تم استبعاده من المعسكر ناديه هيستبعد اللاعب.
وأردف قائلا: أحمد فتوح عمره 25 سنة ولاعب 23 مباراة مع المنتخب وهو من كباتن المنتخب، وصبحي عمره 24 سنة وفي الدوري بتاعنا 2 حراس بس عمرهم أقل من 30 سنة بيلعبوا أساسي مع أندياتهم وصبحي هيكون حارس مرمى رائع جدًا، ووقت لما بيعجبني لاعب مش بسيبه يقع قدامي بسهولة، ومش معنى كده إن صبحي هيكون معانا على طول صبحي لعب ماتش واحد بس معانا بس أنا بحب أواجه الأمور بصراحة وبراعي ضميري في الاختيارات.
واختتم حديثه قائلا: ليه أسيب فتوح وصبحي وهما لسه في مرحلة التحقيق في الزمالك؟ .. عشان أنهي الكلام في النقطة دي أنا بحب يكون معايا 3 حراس في المعسكر 2 حراس عندهم خبرة وحارس تاني صغير عشان بعد 4 أو 5 سنين اللاعب اللي عمره 35 هيكون عمره 41 ولذلك لازم يكون معايا حارس صغير ولو اللاعب الصغير ده ماعندوش الكفاءة الفنية مش هجيبه.
