فجر محمد عواد حارس مرمي فريق الكرة الأول بنادي الزمالك العديد من المفاجأت بعد استبعاده من قائمة منتخب مصر الوطني المشاركة فى بطولة كأس امم افريقيا 2024.
قال محمد عواد حارس مرمى نادي الزمالك عبر تصريحات تليفزيونية:
بعد عدم انضمامي لمعسكر منتخب مصر في أول معسكر مع فيتوريا عبرت عن غضبي على السوشيال ميديا لانه محدش اتواصل معايا
تابع: عبرت عن غضبي سواء كان ده غلط أو صح ولكني حسيت بالراحة بعدها لأني كنت ماشي بشكل مميز وقتها ومعرفشي سبب عدم انضمامي للمنتخب وده يمكن عملي مشكله بعد كده
استطرد: أنا في الاخر أتمنى كل التوفيق لمنتخب مصر في أمم إفريقيا والتتويج باللقب
وقال أيضا: أتمنى أننا نتوج بالبطولة لأن لاعب اسطوري زي محمد صلاح مينفعشي بعد كل اللي وصله ميُحققش اللقب مع منتخب مصر
واصل: بحس إني غير محظوظ مع منتخب مصر في معسكرات كتيرة كان ممكن أتواجد فيها، ولكن لا محصلشي نصيب
وزاد: في موسم تأهل منتخب مصر لكأس العالم عملت كل حاجه وزعلت بسبب عدم انضمامي ويمكن ده كان سبب خلافي مع أحمد ناجي وقتها
وأكمل : فيتوريا شخصية جيدة ولما كنت معاه في أخر معسكر ليا اتكلمت معاه عن اللي كتبته في وقت سابق ولكنه أكد ليا أنه مش منزعج من الموضوع
وعن شعوره بعد ضم محمد صبحي قال : ده نصيب طبعاً وصبحي هو من الحراس الصغار اللي ليهم مستقبل بالتأكيد أتمنى أكون موجود ونتنافس في النادي لكن هو نصيب وربنا كتب له رزقه بالتواجد في البطولة
وتابع أيضا: هو صاحبي ودايمًا بنخرج سوا وتربطنا علاقة أسرية، والموضوع عمري ما أخدت بأي حساسية والاختيارات وجهة نظر للمدير الفني ومن حقه ضم أي لاعب.
وعن التجديد للزمالك قال: مفيش حاجه لسه، أنا أتمنى الاستمرار مع الزمالك، قعدت مع كابتن حسين لبيب وهو شخصية محترمة، والرغبة موجودة بين الطرفين لكن متكلمناش في أي أمور مالية
وعن تخفيض عقده الجديد قال عواد: متكلمناش أنا والكابتن حسين لبيب في الأمر ده وأنا خدت منه على دفعة معنوية كبيرة وأنا احترمته وقدرته بعد موقفه معايا وهو قالي أن النادي مُرحب باستمراري وأنه هيتم تقديري بالشكل المناسب لكن لأنهم تولوا المسؤولية من فترة قصيرة وعندهم أولويات لسه متكلمناش في الملف ده وأنا أهم حاجه بالنسبالي الدعم المعنوي وأنا لمست منه الاحترام والتقدير، بعد كده الأمور المادية سهل نصل فيها لاتفاق
وعن عروض الاحتراف قال: العروض اللي بتيجي ليا من السعودية بسبب الانطباع الفني الجيد والأخلاقي اللي سبتها مع الوحدة ولكن الزمالك دايما كان بيرفض العروض دي وحتى الآن أنا بسيب الأمر للإدارة
وعن أزماته مع حراس الزمالك قال: لحد دلوقتي جنش وأبو جبل أصدقائي المشاكل كان يتم تصديرها في السوشيال ميديا وهما طيبين جدًا على المستوى الشخصي
وأختتم حديثه قائلا : أنا وقعت للزمالك مرتين، في 2014 مع الكابتن أحمد سليمان وقبلها مع الكابتن حسام حسن كان عندي 17 سنة لكن كان لازم أسافر للخارج وارجع علشان أوقع على عقد احترافي، لأنني كنت صغير السن وقلت لو أحمد الشناوي هينضم للزمالك معنديش مانع إني أرجع للإسماعيلي لأننا كنا مع بعض في منتخب مصر، وكنا عايزين نلعب علشان نتواجد في منتخب مصر وبعدها الزمالك ضم الشناوي فعلا
