حرص المخرج محمد نصر، على الرد على تصريحات رضا عبد العال، نجم الكرة المصرية السابق، ضده واتهامه بالتسبب في إلغاء هدف لفريق مازيمبي الكونغولي لصالح النادي الأهلي، على حد قوله.
كان الأهلي حقق الفوز على مازيمبي الكونغولي بثلاثية نظيفة، وتأهل للمباراة النهائية لبطولة دوري أبطال أفريقيا، ليخرج بعدها رضا عبد العال قائلا في تصريحات تلفزيونية: "أنا نفسي الأهلي يكسب وهكون سعيد بس من غير ما حد يقول إن الحكم ساعده ولغى هدف، أنا دايما بقول حق ربنا وماليش دعوة بأي انتماء".
وأضاف: "فيه خدعة سينمائية وفيه خدعة مخرج، ولو تشوف السنة اللي فاتت في مباراة الرجاء، الكرة اصطدمت في ركبة اللاعب وتم احتسابها ركلة جزاء أيضا، وكرة مباراة مازيمبي هدف صحيح ولم تلمس يد المهاجم.. الكرة ذهبت من رأس رامي ربيعة إلى لاعب مازيمبي، دون لمس يد أي لاعب، (محدش هينزل معايا القبر)، أنا بقول حق ربنا، والدليل أن ما فيش ولا لاعب اعترض من النادي الأهلي، والجمهور نفسه كان بيشجع الفريق من أجل التعويض".
وتابع تصريحاته قائلا "هذه الكرة لو للأهلي كانت احتسبت هدف دون التحدث من أحد، طيب عاوز أوجه سؤال، كرة كريم نيدفيد في مباراة الزمالك التي يستحق عليها الطرد، لما لم يتم إعادتها؟".
ويبدو أن هذه التصريحات لم ترق للمخرج محمد نصر الذي خرج عبر حسابه الشخصي بفيسبوك وكتب قائلا " "أولا.. مبروك لنادي الزمالك التأهل للنهائي وعقبال البطولة، وكمان مبروك الأهلي بطل كأس الكرة الطائرة ويستمر الأهلي ملوك الصالات بجدارة".
أضاف: "ثانيا... وده الأهم كابتن رضا عبد العال هو أنت بتزووم عليا ليه وأنت عارف أني مش مخرج ماتش الأهلي.. ثالثا هو انت تعرف أيه عن الفار ولا هو أي هجص بيتقال وخلاص، وناس كتير زامت عليا وظلمتني لمجرد إن اسمي محمد نصر، اللي بيكسب الأهلي البطولات وكأن مافيش لعيبة ولا مدير فني ولا إدارة ولا جمهور".
وتابع: "رابعا... كل الناس بما فيهم أنت لازم يعرفوا إن الفار هو المتحكم في المخرج مش العكس لأن كل الكاميرات اللي عندي هي نفسها عند الفار إلى يراجعها كلها ويستدعى الحكم ويدي قرار.. خامسا.. ممنوع منعا باتا إن بعد قرار الفار أنك تعيد أي إعادة غير إللي راجعها الفار فقط".
وأوضح: "سادسا... علشان لعبة نيدفيد وناصر إللي ممكن ترقى لطرد مباشر ممنوع إعادة أي لعبة لم يتخذ الحكم أو الفار فيها قرار، وده من لجنة الحكام علشان الجمهور ما يثورش على الحكم وده كلامهم، وأعتقد لازم اللجنة تراجع نفسها في التعليمات دي لأن لازم يكون فيه إعادة علشان تزيل أي شك ومحدش يظلم المخرج".
وأكمل: "سابعا.. أنا مش ساحر هوقف الكرة على يد اللاعب أو أجيب زاوية معينة تلغي هدف أو ضربة جزاء أو ألعب بالكاميرات جلا جلا ده كلام مش صح".
وشدد على "وأخيرا.. مش عيب أن الإنسان يغلط ويعتذر زى مانا عملت مع جمهور الزمالك، رغم إن الفار وتعليماته هو الأساس مش المخرج، وممكن أقول تصريح في لحظة انفعال من شخص مستفز وده حصل واستغفرت ربنا عليه وحجيت وربنا، سامحني لأن شغلنا للجمهور مش لنفسنا مفيش انتماء فيه".
وأتم حديثه: "أنا أهلاوى وأعتز بأهلاويتي وحبى للاتحاد أيضا. لكن برة شغلى لأني لما أعمل شغل محايد على الجميع الكل هيحترمنى، وده الأهم مع مراعاة ضميرك ومراعاة المولى وعدم ظلم أي فريق كبير أو صغير، لأن العمر قصير.. دي فرصة أشرح للناس ويفهموا قصة الفار مع إن لجنة الحكام كابتن وجيه وكابتن فاروق المفروض تطلع ببيان تقول للناس تعليماتها أيه للمخرجين ويشرحوا دور الفار ودور المخرج علشان الناس ترتاح ويبقى الاحترام بينا هو الأساس".
