فجر أحمد حسام ميدو نجم نادي الزمالك السابق عديد المفاجآت حول الملفات العالقة بين قطبي الكرة المصرية القلعة البيضاء والنادي الأهلي.
وتطرق ميدو إلي أزمة قضية نادي القرن بين الأهلي وغريمه التقليدي نادي الزمالك في الآونة الأخيرة.
كما تحدث ميدو عن النسب المئوية المتفاوتة الخاصة بملف عقود الرعاية لكبار أندية الدوري الممتاز.
بوابة البلد سبورت تسلط الضوء على ابرز تصريحات ميدو حول أزمات قطبي الكرة المصرية.
قال ميدو عبر تصريحات تليفزيونية : استمرار الزمالك على منافسة الأهلي رغم الظروف يقولك إن ده فريق بطل، نجرب إن الزمالك ياخد حقه في الاستقرار الإداري وهتلاقي منافسه تانية والزمالك هو نادي الوطنية الحقيقي في مصر اللي حارب الاحتلال.
تابع ميدو:
المعايير التي تم وضعها من الكاف في 1994، لتحديد نادي القرن معمول بالمقاس للأهلي والزمالك من حقه فتح تحقيق في قضية نادي القرن، بسبب فساد عيسى حياتو.
وقال أيضا: إذا كنت رئيسا للزمالك ساعمل على فتح ملف نادي القرن والزمالك اتظلم في ملف نادي القرن واللوائح اتفصلت على مقاس الاهلي ورئيس الكاف وقتها عيسى حياتو خرج من الاتحاد الافريقي بتهم قضايا فساد وأنا لو مكان مسؤولين الزمالك حاليا استغل النقطه دي لأخذ حق الزمالك في اللقب لانه الأهلي استفاد منه تسويقيا ورئيس الكاف متهم بالفساد.
أضاف ميدو :
مكنتش متوقع إنضمام إمام عاشور للأهلي، بعد الإساءة للكابتن صالح سليم
ميدو وعمري ما اتخيلت أن الأهلي يوصل بيه أن لاعب تجاوز في حقه يديله الشرف أنه يلبس تيشرت الأهلي بعد انضمام إمام عاشور.
وعن أزمات الدوري قال: هناك عدالة في توزيع المباريات بالدوري الممتاز، والأهلي يتمتع بالتأجيلات ، ومينفعش يبقى في مؤجلات اكتر من أسبوعين .
استطرد ميدو:
بطولات كتير ضاعت من الزمالك، بسبب أخطاء تحكيمية ومينفعش رئيس الوكالة الراعية يكون رئيس نادي وده اللي حصل مع حسن حمدي في الأهلي ووكالة الأهرام، دي كارثة لا تحدث في أي دولة في العالم والزمالك كان بيبقى مخلص لاعبين واتفاقات مع لاعبين وتراجعوا بسبب إن فلوس الأهلي كانت على الترابيزة وامتيازات أكتر.
وعن الإحصائية كانت إن كل 50 مليون منهم 75% بيشجعوا الأهلي قال ميدو : لأ طبعاً، إزاي الأهلي يكون عنده الإحصائية دي ومايعلنهاش رسمي، ده كلام مش مظبوط الأكثر شغفًا الزمالك.
واصل ميدو: من الطبيعي أن يكون الأهلي متفوقا على الزمالك في عقود الرعاية وازاي حسن حمدي يبقى رئيس وكالة الأهرام للإعلان راعي الأهلي وراعي الزمالك وهو في الأصل رئيس النادي الأهلي دا مش موجود في أي حتة في العالم، دا تضارب واضح وصريح في المصالح
أكمل ميدو:الزمالك ظلم تحكيميا سنوات ومكنشي في أدوات الزمالك يطالب بحقه فيها واستمرار الزمالك على المنافسة مع الأهلي رغم الظروف الصعبة يدل على أنه بطل وإذا حصل الزمالك على الاستقرار " شوفوا هيعمل ايه ".
واختتم حديثه قائلا: أنا بقول زي ما كل مؤسسات الدولة بتقف وراء الأهلي لما يحصله اي حاجه لازم يحصل نفس الكلام مع الزمالك مش معقول يعني على مدار التاريخ مفيش استقرار للمجالس واسهل حاجه يطلع قرار بهد المجالس والكلام ده مش بيحصل في الأهلي بدليل أن كل اللي اتشالوا رجعوا تاني بعدها وملقوش مخالفات لكن في الأهلي بيتم وقف القرار وفي الزمالك أسهل حاجه بيتنفذ القرار.
