كشف عبدالله مصطفى فرد أمن المول الشهير بالشيخ زايد الذي تعرض للاعتداء من إمام عاشور لاعب الأهلي كواليس ناريه بشأن الواقعة الشهيرة وتواصل إدارة الأحمر معه للتنازل عن المحضر وعرض الصلح.
وقال عبد الله خلال مداخلة هاتفية بإحدي القنوات الفضائية: أثناء أداء عملي في المول يوم الأربعاء الماضي فوجئت الساعه 7 صباحا باندفاع كابتن مصر إمام عاشور بعربيته لداخل المول.
وأضاف: كابتن امام كان منفعل ودخل كأنه بيعمل سبرينت في الملعب وطالبت أفراد الأمن بعدم التعرض له بصفتي المشرف عليهم لإنه كان في حالة ثورة وتوجهت له وقلت له ياكابتن مينفعش تدخل كدة فيه إيه؟!.
تابع: كابتن إمام عاشور بدأ يشتم ويعلي صوته بالفاظ بذيئه جدا وانفعل علي ومسكني من الملابس وهو كان جاي يتخانق وادعى ان زوجته اتعاكست في المول وهي خارجه من السينما الساعة الخامسة فجرا.
وأشار إلي أن زوجة كابتن إمام اتعاكست امتى وفين الله اعلم لإنها مبلغتش انها اتعاكست ولو كان حصل مشكله كنا عرفنا كافراد أمن هي كانت في حفله سينما من الساعه 3 صباحا لـ5 فجرا وكان معها كتيبة مع اخواتها واخواته ومحدش منهم بلغ انها اتعاكست فين الناس اللي كانوا معكي ليه محدش اشتكى للامن علشان يجيب لك حقك.
وأكمل فرد الأمن: انت جاي الساعة 7 صباحا ومفيش فرصة الأحداث سريعة وكابتن إمام مسك في هدومي حاولت أفادي نفسي وزقني وشتمني ووقعت على الارض وضربوني حوالي 15 شخص كانوا معاه ولم نشتبك معهم كافراد أمن لاننا مش هندخل في معركة لكن هناخد حقنا بالقانون.
واصل: بعد ماشتمني وزقني اغمى عليا مين ضربني هو ولا الحاشية اللي كانت معه إلا لو لا وجوده عمرهم ما كانوا دخلوا المول.
وأتم: هو الاسطورة محمي بالاهلي ومنتخب مصر ونجم سوبر في الدولة المصرية ولما فوقت مشي هو واللي معاه.
وأردف: بعد الانتهاء من عملي تقدمت ببلاغ ضد كابتن إمام وقعدت في القسم 12 ساعه حتى انهي إجراءات البلاغ.
واختتم حديثه قائلا : لم نتصالح مع كابتن إمام وادارة الاهلي تواصلت معايا وقالوا هنبلغك بالميعاد ومحصلش اتفاق علي الميعاد بدون ذكر اسماء عن مين تواصل معايا قالولي هنقعد بحضور كايتن امام، وكباتن آخرين، وهيتم عرض الصلح هو اللي يعرض التصالح طبعا ويقدم اعتذار كافي واحنا ماشين في الإجراءات القانونية.
