زيزو هيجدد.. المندوه يكشف تفاصيل ديون الزمالك وفشل الصفقات

كشف حسام المندوه أمين صندوق نادي الزمالك، كواليس مديونية القلعة البيضاء وملف تجديد عقد أحمد سيد زيزو.

وتطرق حسام المندوه، إلى ملف سامسون أكينولا وغرامة محمود عبدالمنعم كهربا نجم النادي الأهلي.

بوابة البلد سبورت تسلط الضوء على أبرز تصريحات حسام المندوه امين صندوق نادي الزمالك.

قال حسام المندوه أمين صندوق نادي الزمالك عبر تصريحات تليفزيونية: عرض نيوم لزيزو كان اكتر من 5 مليون دولار و لكن مصلحة النادي ان زيزو يكمل وده القرار اللي خدناه احنا و زيزو وهنقعد مع زيزو للتجديد في الفترة اللي جاية بس نركز في ماتش يوم 27 الاول و بعدها نقعد و نتكلم نعدي بس الفترة دي .

وتابع: استلمنا الزمالك من 10 شهور وعليه ديون 2 مليار و 500 مليون لهيئات مختلفة سيادية ، التأمنيات ، الضرايب ، الاتحادات ، الفرق الرياضية ، قريق الكورة ، قضايا الفيفا ، أرض أكتوبر .

وأضاف: في ال 10 شهور منذ تولي المجلس قدر انه يصرف مليار و 200 مليون ، 200 مليون منهم قروض من البنوك و الباقي من محبين النادي ، و الرعاه ، الإشتراكات .

واستطرد: الزمالك استلم من كهربا الغرامة بشيك مقبول الدفع بقيمة 69 مليون جنيه وشيك اخر ب 7 مليون جنيه وكل المحبين من النادي الأهلي كان ليهم دور في حل أزمة كهربا وقضية كهربا ابتدت في 2019 و انتهت في 2024 بقيادة حسين لبيب .

واصل: ممدوح عباس لا يتدخل إطلاقاً في قرارات مجلس الإدارة ، ممدوح عباس محب للنادي و داعم لمجلس الإدارة و لكن كل قرارات النادي تطلق من غرفة محلس الإدارة فقط .

وأكمل: في ناس بتكلم اللي بنتعامل معاهم برة عشان يخوفوهم مننا ، الموضوع مش بوبيندزا ، إحنا اتقالنا نفس الكلام من سبورتنج لشبونة وقت المفاوضات معاهم ، الناس كان بيوصلها رسايل و كلام يخوفهم من التعامل معانا و ده اللي خلي الناس متقعدش تتكلم معانا في الاول .

وأتم: في شهر 10 الزمالك هيصدر عليه عقوبة وقف قيد مرة اخري .. ده بشكل مؤكد ، في يوم ٤ اكتوبر المقبل الزمالك مطالب ب 133 الف يورو مستحقين لخالد بوطيب ، و 172 الف دولار لصالح اتشيمبونج.

وقال حسام المندوه أيضا:قبل السوبر الإفريقي هنكون سددنا كل المستحقات القديمة للاعيبة ، محدش هيبقى ليه عندنا فلوس من اللاعيبة قبل الماتش .

وأردف : اللي بيبعت الرسايل لبوبيندزا وقاله ظروف النادي المادية و اللي عمل كده مع لشبونة كلها اطراف زمالكاوية بنسبة كبيرة .

وأسهب: الزمالك ليه حق في قضية بوبيندزا و هنروح نشتكيه في الفيفا واحنا فرحانين اننا هنروح للفيفا نشتكي و نطلب فلوس مش ندفع فلوس ، و مش هنقول تفاصيل عشان نحفظ حقوقنا في القضية ، و لكن خلال ايام هنشتكي اللاعب .

وأشار إلى أن صفقات كلها تمت عن طريق المدير الفني ، بس لازم الناس تعرف ان الصفقات تمت بشكل ميبقاش مرهق للنادي مادياً ، اعارات ، انتقالات حرة عشان مندفعش فلوس للأندية .. ده اللي نقدر عليه في الوقت الحالي .

وشدد علي أن نادي الزمالك محتاج الاستقرار ٤ سنين بس وهيقف علي رجله تاني .. بس لو ده محصلش النادي هيبقى في خطر .

وقال: الناس بتقول إن احنا عارفين المشاكل من قبل ما نترشح و درسينها ، ايوة ده حقيقي ، بس فيه متغيرات بتحصل منها القضايا والطعون اللي علينا كل شهر ، الحروب اللي بتتعمل علي صفقاتنا في الداخل و الخارج ، في ناس مش عايزة المجلس ينجح ، بس احنا مكملين في التحدي بس الجماهير تبقى معانا .

وعن لجنة الكرة قال حسام المندوه : هنعمل لجنة كورة و شركة كورة أعضائها من داخل وخارج مجلس الإدارة وفرقة الكورة كان في ناس فيها ليها مستحقات بقالها موسمين .

ولفت إلى أن نادي الزمالك مش هيبقى كويس كن فيكون ، احنا معناش عصا سحرية ، الجماهير لازم تساعدنا و احنا خطتنا أن النادي يبقى قادر يقف علي رجله لوحده في اخر دورتنا الإنتخابية .

وعن أزمة القيد قال : فكينا القيد في اكتر من لعبة زي الباسكت و اليد ، كان في مشكلة مع ال BAl و حليناها . مستحقات لاعيبة ، مستحقات اندية تانية ، مستحقات مدربين ، احنا استلمنا قطاع العاب الصالات وضعه سئ، و لكن السنادي هتبقى افضل ان شاء الله واللي بعدها هتبقى أحسن ولكن واحدة واحدة .

وعن الصفقات قال: لو في صفقة اجنبية معصلجة معانا بقينا بنبعتلهم فيديوهات عن جماهير نادي الزمالك نعرفهم هما هيلعبو فين ، هنا حاجة تانية و جماهير تانية .. و آخرهم كونراد الفيديوهات ومعنديش فكرة عن مستقبل الصفقات بس لسة في صفقات تانية هتيجي إن شاء الله .

واستطرد: فرقة الكورة لما استلمنا كان ليها مستحقات قديمة عن سنتين 2022 و 2023 بمبلغ 402 مليون جنيه، قبل السوبر هنكون سددنا 95 ٪؜ من المبلغ ده ، ال 5 ٪؜ المتبقية هتكون ليها علاقة بالمميزات في العقود ، مين جاب كام جول ، مين شارك اد ايه ، بنود التعاقد يعني .

وعن قمة الاهلي قال: مدخلات مباراة السوبر الإفريقي هتتوجه بشكل كبير لألعاب الصالات .

وعن كرة الصالات قال: ألعاب الصالات كانت ليها مستحقات ٢٢٣ مليون جنيه عن سنتين 2022 و 2023 و سددنا جزء كبير جداً.

وعن المديونية قال: لما استلمنا النادي كان في 114 مليون جنيه سلف طلعت لموظفين في النادي و لقيناها في الميزانية .. و دي نوع من انواع مخالفات المجلس السابق ، و اتسوي منهم مبلغ كبير بس في منهم مبلغ مفقود حوالي 25 مليون جنيه ، لناس مبقتش في النادي من سنين .. طب بياخدو فلوس ليه؟.

وعن الأجانب قال حسام المندوه : بالنسبة لابراهيما نداي مكنش فيه تواصل قبل كده معاه بس حالياً في تواصل مع المحامي بتاعه عشان نعمل تسوية .. سامسون اكنيولا مش هدخل في تفاصيل بس ادارة الكورة شغالة ع الملف ده .

وواصل: سامسون كان بيتقاضي 600 الف دولار ، و نداي ٧٥٠ الف دولار ، ارقام كبيرة جداً جدا مش هنقدر نلتزم بيها ، الصفقات الجديدة مفيش حد منهم بالارقام دي خالص .

وعن ديون اتحاد الكرة قال: كان علينا لإتحاد الكرة 100 مليون و شوية احنا سددنا حوالي 80 مليون ، و المبلغ المتبقى زاد شوية بسبب الصفقات الأخيرة بس مجدولين و بنسدد و هنخلص المبلغ قريب .

وعن استلام النادي قال: استلمنا النادي يوم 22 اكتوبر و محضر وزارة الشباب الرياضة اللي استلمنا منه النادي كان فيه 2 مليون جنيه كاش اضافة ل ١000 دولار و 110 يورو و كان معانا شيكات ب مبالغ نجمعها ب 10 مليون جنيه نستحق منهم 6 مليون جنيه و 4 مليون هناخدهم بعد سنتين .

وعن العجز في الميزانية قال :

استلمنا النادي علينا 2 مليار و نص التزامات ، و معانا في النادي 10 مليون جنيه اجمالاً بقي كله علي بعضه عجز ميزانية نادي الزمالك وصل ل 700 مليون جنيه .. النادي محتاج مليار جنيه عشان يقف علي رجله و نسد العجز . لو معايا مليار و نص نادي الزمالك هينتعش 100٪؜

وعن الحلول، قال حسام المندوه :

هنعمل كارت مع احدي شركات المدفوعات ، الكارت هيبقى موجه لجماهير نادي الزمالك في العالم كله ، محتاجين جماهير نادي الزمالك تدعم الفكرة الاستثمارية دي ، و هنعلن عنها قريب جداً عشان ندخل فلوس لنادي الزمالك واللي هيشتري الكارت هياخد تخفيضات علي حاجات كتير اوي ، مزايا داخل نادي الزمالك ، زيارات لنادي الزمالك ، زيارات لمتحف نادي الزمالك ، و حاجات تانية هنعلن عنها قريب جداً جداً .

وعن التطوير قال: طورنا مبني ادارة الكورة علي اعلي مستوي و بنوجه الشكر للمهندس هاني بيرزي لانه هو اللي عمله و بندعو الاعلام يجي يصور و يشوف عملنا ايه .

وعن الصفقات قال: فشل المفاوضات مع اشرف بن شرقي ؟ .. الوضع الحالي لا يسمح وماجد هاني او حمدي علاء جوميز هو من طلب تسويقهم بالاعارة أو البيع .

وعن أزمة اللبس قال: شوفنا انتقادات علي اللبس بس ده لبس مؤقت جاي من الشركة و لكن التصميم الجديد حاجة محترمة جداً هتشوفوها و هتعجب الجماهير جداً ان شاء الله .

وعن فرع اكتوبر قال: احنا متأخرين في فرع اكتوبر ؟ .. احنا بقالنا 10 شهور فقط ، ارض اكتوبر ملك لنادي الزمالك من 20 سنة .. بالنسبالنا ده مشروع النجاه لنادي الزمالك و الفترة اللي جاية هنعمل مؤتمر ضخم نعلن فيه عن الرسومات و الانجاز اللي هيتم و الاستثمار المتفق عليه في الفرع ده و تمن العضوية و تفاصيل تانية كتير وهنفتح عضويات فرع اكتوبر الجديد قبل الجمعية العمومية في شهر 10 و العجلة هتبتدي تدور في المشروع ده .

وعن القضايا قال: انا قعدت 7 شهور كل يوم بيترفع عليا قضية جديدة تحديداً انا و كنت بجهز ورقي عشان استقيل من النادي بسبب الطعون في كل قرار باخده او توقيع ليا .. التيار المضاد كان اكبر لولا الحكم اللي انا خدته بصحة موقفي وقولت كده هعرف اشتغل .

واختتم حديثه قائلا: يا جماهير النادي الوصع في النادي صعب حداً جداً جداً ومحتاجين بجد أن الناس تدعمنا .. احنا عندنا مشاكل و خلافات كتير بس كل شوية بيحصل حاجة تجمعنا تاني عشان نلحق النادي من الكبوة اللي هو فيه وده تحدي لينا و المسوار طويل و اللي احنا فيه ده بدايات واحنا مش هننجح غير بيكو.