علق أحمد فهيم عضو مجلس ادارة النادي الإسماعيلي علي تعرض قلعة الدراويش للظلم التحكيمي إضافة إلي الغرامات المالية المفروضة على ناديه..
قال أحمد فهيم عضو مجلس إدارة نادي الإسماعيلي عبر تصريحات تليفزيونية:أنا مش باصص للنتيجه أكثر من الأخطاء التحكيمية اللي بتحصل من الحكام ضدنا كنادي إسماعيلي.
تابع: احنا كمجلس إدارة مش بنحب نظهر إعلاميا .. لكن لما جينا نحب نعمل مداخلات محدش خلانا نتكلم.
أضاف: الناس بتقولك طلعوا بيانات.. طيب انا هستفيد ايه بعدها .. أنا مبحبش اضرب طلقات في الهواء.
استطرد: كل خطأ تحكيمي يقولك حكم الفار مرداش يستدعى حكم الساحه.. دي بقت شغلانه بقى كل حكم يقولك مينفعشي اروح الفار غير لما الحكم يستدعيني.
واصل: أنا عايز الناس تبقى رحيمه بالاسماعيلي شويه، احنا كمجلس جينا لقينا النادي عليه غرامات نصف مليار جنيه تقريباً مطلوبين مننا وإيقاف قيد ومفيش لعيبه قادر تجببها، مش هنقدر كمان نستحمل فوقها أخطاء الحكام.
أكمل : كل البرامج والقنوات لما كهربا لاعب الأهلي كان عليه غرامه ومطلوب منهم يدفعوا 70 مليون جنيه تقريباً.. كانوا بيدوروا معاهم ازاي يجيبوا المبلغ الكبير ده للنادي الأهلي.
أتم: أنا عايز اقولك غرامه كهربا دي مش مكمله مبلغ واحد حتى من اللي على الإسماعيلي ومحدش واقف معانا.
وقال أيضا: احنا مش طالبين من حد غير العدل بس والله العدل بس .. احنا اه كان في فترات سابقه كان عندنا مشاكل وأزمات وحاجات كتيره غلط ... بس احنا شغالين من وقت ما جينا مش طالبين غير العدل.
واختتم حديثه قائلا: بإذن الله تعالى الإسماعيلي هيقعد في الدوري ومش هيهبط وحقه مش هيروح واللعيبه تكسب ماتشين بس وهياخدوا الثقة.
